Asteazkena, 2015eko apirilak 15a.
«Federazioak beste
era batean egin behar ditu gauzak».
Santiago Gonzalez. Xake
jokalaria.
Bosgarrenez irabazi berri du
Euskadiko Xake Txapelketa, hirugarrenez jarraian. Oso kritiko da Euskadiko
Federazioarekin. «Ez da erakunde gardena dirua kudeatzerakoan».
Izen bera ageri da 2013tik
hona jokatu diren Euskadiko Txapelketetako koska gorenean: Santiago Gonzalez de
La Torre. 31 urteko jokalari bilbotarrak denbora darama berari aurre egin
diezaiokeen aurkaririk topatu ezinik.
Iaz, Euskadiko txapela irabazi arren, oso kritiko azaldu zinen zeure
buruarekin. Aurten, gusturago zaude egin duzun lanarekin?
Aurten, bai, aurten oso pozik nago egin dudan lanarekin; maila bikainean aritu
naiz.
Mario Gomezek bederatzi aldiz irabazi du txapela. Zu jada bostetan nagusitu
zara. Aldea jada ez da horren handia?
Pausoz pauso joan nahi dut. Ez dut buruan Mario Gomezen marka. Txapelketa
honetarako, adibidez, erronka bat jarri nion neure buruari: titulua hirutan
jarraian irabazitako lehena izatea. Eta lortu dut. Egunen batean Gomezen marka
gertu izanez gero, helduko diot erronka horri.
Maisu handiko titulua lortzea da hurrengo erronka?
Iaz, gogor egin nuen lan, baina gero ez nituen emaitza onak lortu, eta titulua
lortu ezinik geratu nintzen. Aurten intentsitate handiagoz jokatu beharko dut.
Nazioarteko torneo batzuetan lehiatuko naiz, baina ez oso jarraian, eta presio
txikiagoarekin. Gogoetarako urtea da hau niretzat.
Inoiz txapeldun izandako zazpi jokalari aritu dira lehian aurten. Azken
ekitaldien artean maila handienekoa izan da?
Bai. Lehen, hamarren artean edonork irabaz zezakeen.
Eskarmentudun jokalariak ez ezik, jokalari gazteak ere aritu dira: Javier
Martxena (18 urte), Luis David Jimenez (19 urte) eta Eihartze Buiza (16 urte).
Zein iritzi duzu haien inguruan?
Batak bestearekin ez du zerikusirik. Martxenak aurrerapausoak ematen segitzen
du, baina txapelketa oso txarra egin du. Bere maila finkatu beharra dauka.
Jimenez, berriz, apenas ezagutzen dudan; behin bakarrik jokatu dut haren aurka.
Denbora behar du oraindik. Buiza, ordea, ondo ezagutzen dut, nire ikaslea
delako duela bi urtetik hona. Ondo ari da, baina oraindik oso gaztea da, eta
ikusteko dago non dagoen bere muga. Lasaitasuna eta konfiantza eman behar zaio.
Hala ere, uste dut etorkizunean zeresana emango duela.
Oso kritiko zara aspaldi Euskadiko Xake Federazioarekin. Iritzia aldatu
duzu?
Euskadiko Federazioan ez dago aldaketarik, eta ez dut espero ere egotea. Gaur
egun, politikan badago gauzak beste modu batean egiteko nahia, eta nik begi
onez ikusten dut asmo hori. Federazioak ere gauzak beste modu batean egin behar
ditu. Hala ere, ezkorra naiz, uste dut ez dela ezer aldatuko. Interes gehiegi
daude.
Iaz, ez zenuen jokatu Euskadiko Federazioak antolatutako euskal selekzioaren
eta Eskoziakoaren arteko norgehiagoka.
Euskadiko Federazioa ez da gardena dirua kudeatzerakoan. Azkoitiko xake
taldeak, adibidez, ez zuen parte hartu norgehiagoka horretan arrazoi
horregatik. Beste iturri batzuetatik izan dut ekitaldi horren aurrekontuaren
berri, eta nire iritzia da gehiegizkoa izan gabe eskuzabaltasunez jokatu zela.
Ez dakit diru hori nola banatu zen, baina niri, behintzat, ez zidaten euro
bakar bat ere eskaini han parte hartzearen truke. Ez zait iruditzen banaketa duina.
Jokatu ahal izateko, nire lana bazter batean utzi beharra neukan, eta, horren
truke, inor ez zegoen ezer ordaintzeko prest. Etorkizunean, selekzioarekin
jokatzeko proposamen guztiak banan-banan aztertuko ditut.
Nazioarteko lehiaketari dagokionez, zein iritzi duzu Magnus Carlsenek eta
Viswanathan Anandek jokatutako Munduko Txapelketako finalaz?
Carlsenek harritu ninduen berriro, sekulako erraztasuna erakutsi baitzuen
irabazteko. Lehiakide handia da. Levon Aronianen aurka jokatu beharko luke
horrelako buruz burukoren bat. Halaber, Fabiano Caruanari gertutik kasu egin
behar zaio. Hura bakarrik izan da gai Carlsen mendean hartzeko, horrelako
norgehiagokatan. Aronian eta Caruana; horiek dira, nire ustez, hautagai
sendoenak.
“Aurten, bai, aurten, oso
pozik nago egin dudan lanarekin; maila bikainean aritu naiz; halere, beti dago
zer hobetu”.
http://www.berria.eus/paperekoa/1835/022/001/2015-04-15/federazioak_beste_era_batean_egin_behar_ditu_gauzak.htm